Si Tootsieroll

Disyembre 2008

Ilang linggo bago magpasko, nagpasya kaming magkakatrabaho na magkaroon ng exchange gift sa darating na kapaskuhan. Dahil nagtatrabaho kami sa call center (take note: non-voiced kami! morning shift pa yahoooooo!!!!) mayroong kaming pasok sa araw ng pasko. Kanya-kanyang isip ng magiging alias ang bawat isa. Mga ilang sandali pa'y nagbunutan na ng mga monito't monita.

"Bino, ano'ng pangalan ang nabunot mo?" tanong ni Lei, dati ko'ng kaopisina sa aking pinapasukang call center. (nasa Tate na siya ngayon).


"Tootsieroll ang name ng Monita ko." tugon ko.

"Ahh! Ano kayang wish nya para sa exchange gift?" muli niyang usisa.


"Abangan na lang natin bukas." pananapos ko sa usapan.


Kinabukasan



"Yun na ung wish list, nakapost na!" sabi ni Lei.


Mabusisi naming tiningnan ang listahan para mahanap kung ano ang wish ng aking nabunot na pangalan:

THE LITTLE PRINCE by (hirap itype ng name ng author) / STARBUCKS MUG PINK CUSTOMIZABLE


Unang sulyap ko pa lang sa kanyang wishlist ay nakaramdam ako ng pagkainis. Detalyado ang mug na kanyang hinihingi. At ang libro, madali namang hanapin pero napansin ko'ng iba ang pangalan ng author na nasa listahan.

Halos lahat ng sangay ng Starbucks ay hinanapan ko ng mug na pink na customizable pero ako'y nabigo. Di naglao'y bumili na lang ako ng mug sa nasabing tindahan ng kape pero ibang kulay at di yata customizable.


Araw ng Pasko

Nagsabihan na ng mga alias ang bawat isa. Doon ko nalaman ang tunay na katauhan ni tootsie roll. Isang binibining maganda, mabait at may postura. Noon di'y agad ako'ng humingi ng paumanhin dahil di ko nasunod ang kanyang wish. Nagkataon din palang magkasing kaarawan sila ng ating Panginoong Hesus.


Haaaayyyyyyyy.


Para ako'ng pinana ni kupido. Sa hindi maipaliwanag na dahilan ay may iba ako'ng naramdaman. Sing-lakas ng mga tambol ang kabog ng aking dibdib. Daig ko pa ang isang anghel na lumilipad sa langit nung una ko siyang nakilala.

At ang unang pumasok sa isip ko: Wow! bakit di ko siya kagad napansin?



itutuloy....